BARABBA

BARABBA

He tanin ipik leh rimchhe zetah hian kar thum zet min khung ta. Ni e, kar thum ngawt ani ta. Mahse ka tan chuan chatuan tlukzeta rei ani tawh thung, ti hian min khenbeh hun nghakin he hmun tawp zetah hian ni ka chhiar ta chu ani si a le. Tihchhiat rualloh ni in ka inngai thin kha ani a. hetiang hi ani ta in ka hria tiang thil lo intanna chu. Zalen ka nih lai khan vawikhat chu engnge ka chunga lo thleng ka hrethiam bik lo, nawrtu a nasat vang nge, Rome ho vang nge, michhe zawkte leh mihausate inkar zau ta luttuk hi nge, he khawvel buai nuaih nuaih mai hian min thlak danglam zo ? Ka chhuan ngawih ngawih lem loh tur thil tam tak ka tih tak ni, nia thil dik zawng ka ti mawlh lo chu zawng ka chiang khawp mai. In mi ngaihdan tur pawh ka hria e ka sual man ka hmu ani ve mai, a dik alawm, mahse kan ti teh ang. Vawiinni a he tanin a min khungtu te hi kei aia an thatna awm reng reng ka hmu bik love ! Engpawhnise he taninah hian kar thum zet ka thihni nghakin ka tanna ani ta.

Ka chunga ro an rel dan te reng reng kha ka la hrechiang khawp mai, Sanhedrin hovin an taivawn chhunga pawisa nawi vawmluh ang leka awlsamin ka thiamlohna lehkha an chhiar liam puat a, nia chutiang mai chuan thi turin ka chungthu an rel anih hlawm tak kha, thiamloh min chantir awlsam dan em em kha zawng nuih te pawh ati za hial zawk e, engtin nge kha pa tihhlum tur ka nih thu puangchhuaktu kha ka awmna hmun atanga zuangchhuaka ka va pawhsawm vek loh theih zawk ni ka hrethiam bik tawh lo, mahse kha hun atang khan nun leh thih chungchang hi ka tan awmzia vak neiin ka hre ta lo, ka hnar atang hian thaw a chhuak emaw ka thaw a tawp emaw ka tan awmzia vak awm pawn ka hre ta lo. Puithiam lalin ka chungchang thu a chhiarlai chuan ngawi rengin kalo ngaithla a.

‘Rukruk thubuaiah thiamloh chantir i ni’ Puithiam lal chuan ati a, pawisa thir chungchang ka sawi ang maia awlsam khan, engvanga pawisa nawi chu ka rilru a awm tlat nge anih pawh ka hre bik lo, mahse chu chu ka rilru a a thawh dan chu ani tlat si ! Klik.. pawisa nawi pawisa ip ah….

‘Tualthah thubuaiah thiamloh chantir i ni,’ a puan chhunzawm leh ta..Klik.. thu awmze neilo bawk..

‘Rome ho laka hel thubuaiah thiamloh chantir I ni,’..Klik..Thiamloh chang.. ,Thiamloh chang, chu Puithiamin thu ngaihnawmlo luttuk mai a puang lai chu ka thlir chhunzawm zel a.

‘Chungthilte avanga hremna chu…..’ chu Puithiam lal chuan puanzawm hreh hmel zet hian an chawl deuh det kher a.. Lem luttuk ! A sawitur chu ka hria alawm…kraws a KHENBEH…

Khami ni atang khan ka la tang ta reng chu ania hei, tihhlumdan tur che kalphung fel tak an nei ta che emaw tih mai tur ania. A tirah thiamloh an chantir phawt che a, chuan he hremhmun puk rimchhe zet ah hian thawnthla che in an khenbeh hma che in an that hmasa zet ang che ! Ni e, an that hmasa ang che, atirin I thlarau chu an pawtsawm vek ang, an rapthlak ania misual rapthlak ber ber thlarau mumal nei awm pawha langlo te pawh an thlarau zawng chhuakin, chhe thei ang bera tihchhiat sak an ni thin. He puk ah hi chuan khenbeh aia rapthlak zawka sawisakin kan awm a, khaidiat ri rawk rawk thawm te, tanin thir kawngkhar chung lam atanga tuifer ri keuh keuh te, zan reha patling mangang taka rum kawk kawk thawm te leh na tuar chiau vawn vawn thawm te hi ngaiah neih theih ani lova, he hnuchhawn ram rapthlak tak mai hremhmun kawchhung rilber ah hian ka khawsa chu ani si a le !

Rome ho chauhvin mi khenbeh theihna dan an neih avangin ti hian Pilatan ka thihna tur a nemngheh hun nghakin ka awm a. A thim takzet a ni, ka thih hun chu ka nghak mek a, vengtu an inthlak a chhunlai ani tih ka hrethiam ve nghal mai a, vengtu dang pahnih an rawn thlen belh leh a. Chuti anih chuan mi tu emaw chu nikhaw hrelo khawpa an sawisak hnuin he hmunah hian an rawn dah belh leh dawn a, a thihni a hnaih ve sawt dawn tihna ani. Chung vengtu dang lo thlengthar te titi chu hriat tumin uluk zetin ka beng ka chhi a, mahse an tawng zawi lulai em a hriattheih aram erawh ka nei lem lo.

Chu le ! Ka hming a ni lawm ni an lam rik chu ? Ka rilru a beisena chhete ka lo neih ve thin te chu ka hming an lam nawn ri ka hriat leh rual rual chuan chawplehchilhin a bo ta nghal veka, “Barabba” ..e khai ..mipui au rual thawm ani ! A chiang ta beisei tur chuang a awm ta love. Ka hun a thleng ta.

Sipai pahnih in ka tanna kawngkhar an rawn hawng a, min kai chhuak a, kei pawn tha takin an thu ka awih mai a, an thu tha taka zawm mai loh atthlakzia ka hrechiang tawh tlat. Hremhmun lalpa kan kai tho hi ani ringawt ! Chutichuan ka kut leh ke ah chuan kawl min buntir a rip chhung ata chu min hruai chhuak ta a, pawn eng kan chhuak thut chu ka mit a del dawn ni berin ka hria, khaw eng ka hmuh lohna a rei ta deuh em atin ni. Ka khawhmuh te an pangngai hnu chuan vengtu te chu zawhna hlira khat hmelpu in ka melh ta thung a.

‘Khawnge min hruai in tum, khawngaihin min hrilh hram the u,’ ka aw chhuak chu a ri ve che che ani ber e..

Min thlunna khaidiata phih nek leh ka tukhuma tianga rawn khawn zui fawk chu ka chhanna dawn awmchhun ani, ka zawt zui lo chiang teh e. Pilata tual ah rorelsak turin min hruai ani tih erawh ka hre zui ta thuai tho a, he Pilata hian thiamloh min chantir anih chuan kha rip chhung hrehawm zetah khan ka kir a ngai dawn tawh lo tihna chu ani phawt mai a, zawitein ka nui chhuak hak a, mu leh mal reng ka nei tawhlo ani e.

Chulai hmunah chuan buaina eng emaw zawng a awm chiang ani, Pilata chuan mi tu emaw hi ro alo relsak mek a, chupa chu kei aia nasa a sawisak a tawk ani tih pawh ka hmu hmaih lo, a mit a duk ruih a a hmui a thler a, hruihruala an vuakna a vun chu a tet hrup mai bawk a, a thawk dan atang chuan a nakruh thenkhat a fel chiahlo ani tih pawh ka hrethiam mai a, a mit bul kak atang chuan thisen a chhuak reng mai bawk a. Chutiang renga hliam nasa mitang dang ka hmuh awm reng ka la hre lo. Chutia chupa chuan eng pawi liantham tehreng nge maw a khawih ni heti kauva tam an punkhawm phah ni ti in ka ngaihtuah neuh neuh a.

Rorelna thawm hriatphakna awm vel kan thlen chuan sipaite chuan min dinpui ta a, an hekna thu chungchangah Pilata chuan thu alo zawtfiah mek a.

Judate lal i ni em ?

Chupa Isua an tia an koh chuan zawimuangin Pilata chu a en chhova kei chuan a hmel chu ka lo thlir renga muk taka inngaihtuah hmel a pu a, a mitmeng buang raih mai chuan Pilata rilru chhungril ber pawh a hmutlang vek mai ni hian ka va hmu a, ka ngaihdan tho chu roreltu pawh chuan a pu ve emaw ni tlemin a tawlhhnung det a, a mak ani ! He Pilata hma ah hian rilru thir anga khauh neite an nih ngawt loh chuan an zam chhe vek thin ani si a ? Mahse he Isua an tih hi chu roreltu zawk ni mai awm hian a lang tlat ani, chuti chuan Isua chu a rawn tawng chhuak a.

‘Aw ni e, Judate Lal ka ni asin.’

Reilote chhung chu rorelana hmun chu a reh duk a, mahse a reh rei lemlo Puithiam lal leh Upa ho thinrim zeta te thawmin a rawn chhunzawm thuai a, mipui pawh an phun zui ta mur mur a. A chanchin eng eng emaw an sawichhuak chhunzawm zel lai chuan Pilata chuan a ban pharchhuakin mipuite chu ngawi turin a vai a, an reh ta diak a kei chuan Isua chu ka va en leh a, a mak ani hei zet chu ani chuan chung puithiamten a chanchin an sawite chu engtinmah a chhanglet hauh lo ! Thiam chang turin a ka a ang ve duh tlat lo !

‘An hekna zozai che hi I hre lo em ni ?’….

A chhang chuang lo, hepa hian thih a tum anih ber hi. Kha lungin rimchhe zet mai, kha hremhmun pindan ah khan khung ani dawn asin, an khenbeh hun thlen hma zawng a rapthlak thei ang bera nghaisak ani dawn asin.. ‘Chhang rawh, chhang ta che maw le, an hekna che engmah hi thu tling a awm chai loh hi mawle !!’ ka rilru chuan ka lo ti ve chiam chiam a. Ani lah chu a ngawi reng a Pilata chu a thlir leh ringawt a. Hah ! En ringawt khan a chhandam dawn lo che. Thianpa I tawngchhuah ve a ngai, mahse tawng a tum tlat lo mai ka ti !

Pilata chuan a lu a thing nawk nawk a, a aw a thian kharh kharh a mak tihna in a khat a a mit chu Isua lak ata lasawnin mipui lam a hawi a.

‘In hria ang a, tun ang kut hun ah hian mitang pakhat ka chhuahsak thei che u a, chuanin,’ a bula sipai chu a bekbawr sar sar a, a sawi chhunzawm a, ‘ He mi.. Isua, Messia in tih hi nge ani saw,’ a kutzungchal chuan mi rawn kawk a, ‘saw pa Barabba saw ka chhuahsak dawn che u.’

Ka harhchhuak thut a ‘chhuah’ a ti a mi ? ‘Chhuah chungchang’ thu a sawi em ni ? …Mahse he pa thiamlohna hi Pilatan a hmu lo kei erawh chu tualthat ka nih bakah Rome sorkar laka hel ka ni. Ka phurna pawh a reh chawpchilh zui nghal a. Beisei tur a awm lo, mipui chuan he pa hi an thlang ngei dawn. Ni e chumi vanga he hmuna lo pungkhawm pawh an nih hlawm tak hi. Mipui aw ngaichangin hnuailam chu ngawi rengin ka bih ta reng a.

‘Barabba ngen rawh u’ Puithiam lal chu a au lauh lauh a, ‘Barabba tiin au rual ta che u, Barabba kan duh.. Barabba min chhuahsak rawh !!’ mipui pawh chuan an rawn zawm ta thuai a. Ka tan an au nia mawle ! Ka chhuah theih nan !!!

Barabba chhuah rawh…!

Barabba min chhuahsak rawh.. !

Hei zet chu Pilata pawn mak atih hmel ta takzet mai le, mipui ho hnenah chuan aw ring takin a au a.

‘Anih he mi Isua Krista hi engtin nge ti ila min duh ?’

‘Kraws ah khengbet rawh.. Kraws ah khengbet rawh,’ tih chu a chhanna dawn a ni !!

‘Enga ti maw ! Eng pawi nge a khawih ???’ ..Pilatan mak ati hle, ni e kei deuh hian mak ka ti…

Khengbet rawh… Khengbet rawh tih zawng chu an chhanletna awmchhun ani. Isua chu ka va en a, ani chuan chung mipui ho chu fiah tak leh inpeih hmel tak, ka sawifiah thiam chiah lo, huatna mitmeng chu ani lo. Thil dang daih ani, khawngaihna lam rawng akai mah zawk, hriatthiamna te pawh a telin ka hria ..chutiang hmelpu chuan anni ho chu alo thlir reng thung a. 

Chu hmun chu huatna in a khat ta emaw tih mai tur ani, ngatinge he mi hi chuti kauva an huat em em ni ? Mifel ani tih ka hre tlat ani, kei ka sualzia lah ka hrechiang khawp mipuite pawn an hai lo. Chupa aia thih chu ka duh pawh ani chuang lo, mahse mak zawng ka ti ani.. !

Pilata tan tihngaihna a awm ta lo, a chhiahhlawh pakhat chu eng emaw a hrilru a, chu chhiahhlawh lo kir leh chuan rangkachak belthleng hi a rawn chawi a, Pilata chuan he thil mak tak mai hi ati ta a, mipui mithmuh chuan uluk fahran hian a kut chu a sil ta bawrh bawrh a, a sil zawh chuan mipui lam chu a hawi chhuak a.

‘HE MIFEL THISEN AH HIAN KA THIANG E,’..a au chhuak a, ‘A THISEN MAWH CHU NANGNI IN NI E,’ mipui chu an han inhawrkhawm tup tup a, an rawn chhanletna chu a rapawm kher mai le !

‘A thisen mawh chu keini leh kan fate chungah awm rawh se.’ !!! 

Rorelna hmun atang chuan sipaiho hmun pakhat ‘Praetorium’ an tih ah chuan min hruai leh a, kan thlen hnu chuan Isua lak ata chu min kai hrang a pindan pakhatah min hruai a ka chngchang te chu tifelin min chhuah ta a. Kar thum liamta khan ka thiltihte avanga thiamloh chantir ka ni, tunah erawh zalen ka ni ta ! Mahse pawn ka chhuakin ka aiawhtupa chunga an thiltih kan hmu zet chu ka lawmna chu a reh leh rang ngei mai..

An tih dan chu insawisakna ka hmuh ve tawh chinah chuan ala rapthlak ber lawr lak ani ! Sipai rual chuan an lo dinhual a, a thawmhnaw hlih sakin puan senduk sintir ani a, sipai pakhat chuan nui chung hian a rawn pan a a lu ah chuan hlingphiara siam lukhum hi a rawn khumtir a, a nawr nat em avangin a hmai chu thisenin a luan sen nghal nguai nguai a, mittui ang mai ani. Mahse chung thisen mittui chiah chu hepa lak atanga mittui an hmuh chhun ani. Chu mi Isua ti a an koh chu a tap tlat lo ! Ani chuan mipui te mak taka a thlir ang tho khan heng amah sawisatu sipaiho hi a thlir a, amah ai chuan anni ho chungchang chu vei zawk ang mai hian, khawngaihna mitmeng nen ! Midang chu nise chung sipai ho chu anchhia an lawh let bawrh bawrh tawh ngei ang, mahse he Isua hi chu ani ve tlat lo..

‘Engnge hetah ila tih reng ?,’ tiin sipai pakhat chuan min rawn hrawk ta thut a, ‘Nge ni rip chhungah khan kan khung leh zawk dawn che ,’ hlauhlawpin ka tlan ta chiam a, chutia ka tlan pah chuan an sawisakpa ka thih aia thi tura chu ka han melhzui leh hram a, reilote ani.. reilote…. mahse chutia a mitmeng fiah tak mai ka en lai chuan ani chuan ka chhungril thuk bera thleng hian a rawn hmu tlang vek ni hian ka hria a, a mitmeng chuan ka thlarau hi a rawn chhuntlang a ni ber mai, mahse a thawhdan chu khang sipaiten ka thlarau rethei min sawisak ang kha erawh ani ve lo. Ani chuan ka thlarau chu a lainat tlat ani. Sipai pakhatin a rawn vuak leh tak ah chuan ani chuan a mit chu a lasawn ta a, an kaithova an kalpui ta a.

Ka tlan ta zel a, kalna mai tur ka hre lo, mahse ka zalen tawh ! Mahse ngatinge ka va hlim si lo em ? Isua kha ani.. . Ka thih aia thi tura kha.. .Golgotha an panpui anga tah chuan an tihlum ang, an khengbet ang… ..Ka ai a awh ang. Ka hmuh leh ngei a ngai ani, misual ngei ka aia thi tlak ngei ani tih ka mit ngei hian a hmuh a, ka beng ngei hian a hriat a ngai tlat ani. Chuti chauh chuan ka thla a muang thei ang, tlang chu ka thleng tep tawh a kalkawng chu mipui hlirin a khat a, an rual chuan ka kal ve ta a. Isua pawh chu ka va hmu zui ta thuai a a theih ang angina ka hnaih zel a ani chuan a kraws chu a hmaa an sawisakna avang chuan a pu hleithei tawh lova, a inpal nawk nawk a a tlu a, a kraws put chuan a delh zui ta lehnghal a. Sipai pakhat chu rawn kalin a rawn chhir zawt zawt a, ‘Tho rawh …tho ta che Juda Uicho-pa tho rawh,’ a rawn ti tuarh tuarh a. Mahse Isua chu a chesawn thei tawh lo, chu Rome sipai chuan a vel chu an thlir thuak thuak a amah hnaih ber pakhat chu a kawrawm ah thamin a phih chhuak ta lawp a kraws chu a put chhawk tir ta hlauh a. Isua chu a kal leh ta a a hnungah chupa chuan kraws chu pu chungin a zui a.

Aw ! Ngahnge he Isua hian luhlul a chhuah duh tlat loh ni, rilru dam taka ka awm theih nan ngatinge khenbeh tur midangte anga chung mipuite leh Rome sipaite chu anchhia a lawh ve duh tlat loh ? Misual ka ai awh tlak ani tih lantir turin huatna nen chung ho chu a melh ve mai loh ni ? Chutih ahnekin ani chuan lainatna a khat mitmengin ngaihdamna nen a thlir tlat mai si ! Engatinge ? Engvang nge ?

Tlang chip kan thleng tawh a, a kutphaha thir an kilh lai chu ka thlir reng a, tuboh an chhut apiang chuan chu kraws anchhedawng ah chuan keimah ka va inhmu ta thin a, ka chan tur asin !… .Mahse anin a chang ta tlat si ! Ani chu thiamlohna neilo ani, kei erawh thiamloh chang ka ni. Ani khenbeh ani, kei erawh zalen ka ni ! A dik mawlh lo ani, a thu sawi te kha ka theihnghilh tawh ngai loving an khenbeh lai ngei te pawh chuan, ‘ Ka pa ngaidam rawh an thiltih hi an hrelo ani,’ Tu nge he pa hi ka aia khenbeh, amah khengbettu te tana ngaihdam la dil cheu tu hi ? A lu chungah chuan chhinchhiahna hi an tar a ziak leh chhiar thiamlo te hriat atan ring zetin chu thu chu an chhiarchhuak ta lauh lauh a‘Isua Krista Judate Lal,’ chutah zet chuan ka insum zo ta lo dan rual lohvin ka mit atang chuan mittui alo luang chhuak ta nguah nguah a, ka naupanlaia ka tah tihloh kha chu ka la tap leh ngai lo, mahse ka insum thei tlat lo. Kei hi tualthattu ka ni mahse ani chu khenbeh ani si.. .Ka lungngaihna thuk tak ata chu mipui ho in an deuhsawhna chuan min hruaichhuak a, huatna namenloin ka lo khat ta a chung mipui ho chu ka thlir a an zavai mai chuan thah vek mai hi ka duh a, mahse kraws a an khenbeh chu ka han thlir leh a ani chuan hmangaihna mitmeng nen keini ho chu min lo thlir thung a, engnge ngaihtuah tur pawh ka hrethiam ta lo…

Darkar kua na vel ani a, darkar thum chuang zet chu khawvel pum a thim tawh a, ni sa tha reng lai kha pawnduma khuh ang mai hian a rawn thim ta ngawt pek anih kha ! Ka thlir reng a tiang hmawra puan ah uaiin thur an chiah a an han pe a, chhete a tem chin hnu chuan a in duh ta lova, mipui pawh an reh thup tawh a, a hun a hnai ta tih hria ang hrim hian a reh tlawk tlawk a, a rapawm takzet zet ani, chutiang renga boruak rit leh rapthlak chu ka damchhungin ka la tawng ngai lo. Kha ka tanna rip chhung ah meuh pawh khan !

Chutihlai tak chuan a rawn au chhuak ta thut a, heng zawng zawng hi hrelawk ang mai in, ka dam chhungin kha tlang reh taka awrawl ka hriat kha ka theihnghilh tawh ngai lovang, ‘Eloi Eloi Lama Sabachthani ?’ Ka Pathian ka Pathian ngahnge min kalsan.. Ka Pathian ka Pathian ngahnge min kalsan, chu thu chu ka beng ah a ri nawn tlut tlut a, Ka Pathian ka Pathian ngahnge min kalsan… ..Kei misual hian Pathian nung chu ka vahbo san ani si a…. Ka hawi chho a ani chu a au leh a.. .a chatthla ta a..

Makti zetin chu hmunah chuan ka ding reng a, enge ka ngaihtuah ber pawh ka hrethiamlo khawvel a nghing dur dur a, mahse chupawh ka hrechang lo, chu hmunah chuan mak tihna a khatin ka ding reng a, engemaw ka chhunga awm hi a thi ta daih ni ber hian ka hria… Ka ngaihtuahlet neuh neuh a.. Isua chu ka ngaihtuah a… .Ka insum leh thei ta pek lo, ka hrawk atang chuan awrawl a rawn baw chhuak hawk hawk a, lungchhe em em in ka tap leh ta chiam a. Chutichuan chu hmun ata chu hmanhmawh zetin ka tlansawn leh ta chiam a.

Ka tlan pah erawh chuan ka hawilet a ka va thlir leh a, ka hriattheih tirh ata a vawikhatna atan huatna keimahah a awm ta lo, thinurna te, ipikna zawng zawng te a kiang ta. He khawvel sualna phurrit tak mai keimaha awm thin chu a kiang ta.. a bo ta ! Tharum thawh chakna leh Phuba lak chakna a reh a. Chutia kha mi ropui tak mai ka aia a thihna hmun ka thlir let lai chuan thil danglam tak mai ka chungah alo thleng ta. Ka hah alo dam a, thlamuanna in ka lo khat a..

Hun rei tak ata tawh a vawikhatnan NGAIHDAM niin ka inhre ve ta…….

signor dexter dimebag zadeng ..